Прапагандыстка Вольга Бондарава, якая нядаўна выбачалася за тое, што назвала «змагаркай» нявестку Аляксандра Лукашэнкі Ганну Сялук, нанесла чарговы ідэалагічны ўдар па сям'і высокапастаўленага палітыка. Гэтым разам прарасійская актывістка абрынулася з крытыкай на Нацыянальны алімпійскі камітэт Беларусі, які ўзначальвае старэйшы сын Лукашэнкі Віктар.
Падставай для абурэння прапагандысткі стаў допуск да ўдзелу ў Алімпійскіх гульнях у Парыжы беларускага барца Абубакара Хаслаханава.
Спартоўцаў, якім дазволілі выступіць на Алімпіядзе ў нейтральным статусе, Бондарава назвала «манкуртамі ад беларускага спорту, якія дзеля магчымых заходніх алімпійскіх плюшак распісаліся ў добраахвотнай адмове ад такога паняцця, як патрыятызм і гонар грамадзяніна».
«А да пацукоў і клапоў адправіўся карэнны „беларус“ (менавіта так, у двукоссі, напісана ў пасце Бондаравай. — Заўв. рэд.) Абубакар Хаслаханаў. Што нядзіўна. Гэтаму што герб, што сцяг, што гімн наш, дзяржаўны — па барабане было ад пачатку, відавочна, а цяпер ужо тым больш. Едзе зарабляць хоць пад сцягам Сурынама», — напісала прапагандыстка.
На гэтым Бондарава не спынілася і параіла Нацыянальнаму алімпійскаму камітэту, якім кіруе Віктар Лукашэнка, «узмацніць патрыятычна-прапагандысцкую працу ў першую чаргу сярод сябе любімых».
«Мы бачым раскладанне ідэй патрыятызму ў нацыянальным спорце. І вельмі з гэтай нагоды смуткуем», — скончыла свой пост Бондарава.
Раней стала вядома, што спецыяльная камісія пры Міжнародным алімпійскім камітэце (МАК), якая разглядала індывідуальныя заяўкі атлетаў і адпаведнасць іх крытэрам нейтральнасці, не дапусціла да гульняў цэлы шэраг спартоўцаў з Беларусі. У прыватнасці, на Алімпіяду ў Парыж МАК прапусціў шэсць беларускіх барцоў, забаніўшы некалькіх лідараў. Мяркуючы з усяго, атлеты, якія не прайшлі праверку камісіі, звязаныя з сілавымі ведамствамі або засвяціліся ў прапагандысцкіх мерапрыемствах.
У выніку НАК прыняў рашэнне дэлегаваць у Парыж толькі Абубакара Хаслаханава, які нарадзіўся ў расійскім Дагестане, але з шасці гадоў жыве ў Беларусі.
Нагадаем, мінулым разам Бондарава абрынулася з крытыкай на нявестку Лукашэнкі Ганну Сялук. Прапагандыстка назвала аўтарку прапагандысцкіх песень «змагаркай». Пазней актывістцы давялося публічна прасіць прабачэння:
«Хачу сказаць, што калі я пісала пра тое, што Ганна Сялук змагарка, я памылялася, бо гэта няпраўда», — напісала Бондарава ў сваім тэлеграм-канале 7 чэрвеня.