Урад Беларусі збіраецца ў найбліжэйшыя гады далей павышаць тарыфы на жыллёва-камунальныя паслугі і ўводзіць дыферэнцыяваную плату за іх. Прычым змяненні закрануць у першую чаргу ацяпленне жылля. Такія планы прапісаныя ў апублікаванай праграме дзейнасці Саўміна на 2025−2029 гады.
Улады збіраюцца заняцца скарачэннем (а пры добрым збегу абставінаў — відаць, нават ліквідацыяй) субсідыявання жыллёва-камунальных паслуг. Нагадаем, яно мяркуе, што больш нізкія тарыфы для насельніцтва перакрываюцца больш высокімі для арганізацый.
Сярод іншага ў планах урада — забяспечыць 100-працэнтную кампенсацыю выдаткаў на жыллёва-камунальныя паслугі. Выключэнне — ацяпленне і падагрэў вады, па якіх насельніцтва цяпер менш за ўсё кампенсуе выдаткаў.
Яшчэ адзін план — павышаць тарыфы на ЖКП паводле новай схемы: рабіць гэта так, каб не менш за 60% ад дабаўлення скіроўваць на падаражанне ацяплення.
Урад таксама хоча ўвесці штоквартальную індэксацыю тарыфу на ЖКП — з улікам росту даходаў насельніцтва. То-бок калі людзі стануць багацейшымі, то і камуналка падаражэе.
Улады таксама збіраюцца ўвесці нормы спажывання асобных жыллёва-камунальных паслуг для насельніцтва, каб у будучыні спаганяць дыферэнцыяваную плату за іх, у тым ліку за спажыванне звыш вызначаных лімітаў.
Нагадаем, тарыфы на жыллёва-камунальныя паслугі ў Беларусі, як правіла, павышаюцца двойчы — у студзені і чэрвені (у 2022 і 2024 гадах летняга падаражэння не было). У разліку на тыпавую двухпакаёвую кватэру з трыма жыхарамі пры нарматыўным спажыванні імі паслуг тарыфы павышаюцца на палову базавай велічыні — цяпер гэта 21 рубель. Але ў асобных кватэрах рост можа быць больш прыкметны.
Чытайце таксама
