Святлана Ціханоўская сустрэлася на палях саміту ААН з еўракамісарам па ўнутраных справах Ілвай Ёхансан. Пра гэта паведамляе яе прэс-служба.
Лідарка дэмакратычных сіл Беларусі прапанавала правесці кансультацыі з Аб’яднаным пераходным кабінетам, вынікам якіх мусяць стаць рэкамендацыі для краін Еўрасаюза па спрашчэнні легалізацыі беларусаў.
Ілва Ёхансан падтрымала гэтую прапанову.
Прадстаўнік Аб’яднанага пераходнага кабінета па замежных справах Валерый Кавалеўскі расказаў еўракамісару пра план дзеянняў па праекце новага пашпарта: мяркуецца арганізаваць выраб узораў пашпарта, стварыць асобнае прадпрыемства па іх выпуску і правесці кампанію па міжнародным прызнанні дакумента.
Нагадаем, з 7 верасня афіцыйна набыў моц указ Аляксандра Лукашэнкі, згодна з якім дыпмісіі больш не будуць выдаваць пашпарты і афармляць некаторыя іншыя дакументы беларусам замежжа.
У Еўрасаюзе асудзілі новы закон і паабяцалі вывучыць «практычныя наступствы» ад яго прыняцця для грамадзян Беларусі, якія жывуць на тэрыторыі ЕС.
У Дзярждэпартаменце ЗША назвалі ўказ Лукашэнкі «апошнім у доўгай чарадзе цынічных адмоваў беларускага рэжыму ад сваіх асноўных абавязанняў перад сваім народам» і збіраюцца абмеркаваць з саюзнікамі і дэмсіламі, чым можна дапамагчы беларусам, якія з’ехалі ад рэпрэсій.
