Аляксандр Лукашэнка на нарадзе 21 снежня гаварыў практычна шэптам. Мяркуючы з усяго, яго прэс-служба зрабіла высновы з вясновага фіяска: каментаваць асіплы голас дазволілі экс-кіраўніку Мінздароўя, а цяпер губернатару Гродзенскай вобласці Уладзіміру Караніку.
«Улічваючы, што гэта ўжо другая нарада за апошнія двое сутак, улічваючы, што я адзіны, хто быў на мінулай нарадзе з медыцынскай адукацыяй, я падышоў да кіраўніка дзяржавы і выдаў пэўныя рэкамендацыі. Улічваючы, што сёння голас… Па-ранейшаму ёсць пэўная праблема… Было сказана, што ўсе пытанні да мяне, што рэкамендацыі не працуюць», — сказаў Каранік.
Ён адзначыў, што з пункту гледжання медыка Аляксандр Лукашэнка — «вельмі нязручны пацыент».
«Яго прымусіць выконваць лекава-ахавальны рэжым практычна немагчыма. Проста паляжаць пару дзён. І тое, што асноўная рэкамендацыя была два дні таму — „галасавы спакой“», — расказаў экс-кіраўнік Мінздароўя пра рэкамендацыі, якія ён даў Лукашэнку.
Каранік лічыць, што ў Лукашэнкі набралася шмат працы — нарады, сустрэчы і гэтак далей, таму рэкамендацый па «галасавым спакоі» ён не выконвае.
«Хоць магу сказаць, што агульны стан прэзідэнта я ацэньваю як вельмі добры, а голас з часам адновіцца», — падсумаваў ён.
Нагадаем, апошні раз Аляксандр Лукашэнка кепска сябе адчуваў на парадзе ў Маскве 9 траўня, а на ўрачыстасцях да 9 траўня ў Мінску замест яго прамову гаварыў міністр абароны Віктар Хрэнін. На Дзень сцяга, герба і гімна ён наогул не прыйшоў, а яго віншаванне зачытваў прэм’ер-міністр Раман Галоўчанка.
Больш чым пяць дзён яго асяроддзе старанна хавала стан палітыка, сам ён на публіцы не паказваўся, што нарадзіла мноства пытанняў. На шосты дзень Лукашэнку ўсё ж паказалі — з відавочнымі прыкметамі ўсё яшчэ не вырашаных праблем са здароўем. Пазней ён сам растлумачыў, што нібыта перанёс адэнавірус.