Мінчукі, асабліва тыя, хто жыве ў Малінаўцы, незадаволеныя якасцю вады пасля пераходу на артэзіянскія крыніцы. У сацсетках яны скардзяцца, што вада стала больш жорсткай: чайнікі, з іх словаў, хутка пакрываюцца накіпам, скура сохне і цярпіць стан валасоў, піша CityDog.
У Threads карыстальніца з нікам julia_minsk напісала, што ёй больш падабалася вада да запуску артэзіянскіх свідравін — яна была празрыстай, хоць і з пахам хлоркі.
Чым артэзіянская вада адрозніваецца ад звычайнай?
Артэзіянскую ваду бяруць з глыбокіх падземных слаёў, а звычайную — з паверхневых крыніц: рэк, азёр і вадасховішчаў.
Здабываючыся з глыбокіх воданепранікальных пародаў, артэзіянская вада, як правіла, праходзіць натуральную фільтрацыю праз грунт і лічыцца чысцейшай, чым звычайная: так, напрыклад, яна не патрабуе хларавання.
Тым не менш зямельныя пароды могуць уплываць на павышаную канцэнтрацыю ў такой вадзе вапны, мінералаў, соляў і металаў, што таксама не надта карысна для арганізма. Ды і паступае ў дамы мінчукоў яна праз тыя ж трубы — таму перад ужываннем яе ўсё роўна лепш загадзя фільтраваць.
У каментарах пад допісам многія пагадзіліся, што якасць вады пагоршылася, і падзяліліся праблемамі, што ўзніклі праз гэта.
«Значна горш: фільтр на душы стаў чорным праз два тыдні, да гэтага праз месяц выкарыстання быў святлейшы ў разы. Мы на Касманаўтаў бяром ваду пітную ў боксах з вадой у дамах — чайнік год без накіпу», — davidovich.maryia.
«Валасы і скура з новай вадой у найжахлі-і-івейшым стане (не дапамагае ні-чо-га). Толькі калі кіпяціць і асобна мыцца», — iren_proffit.
«Сардэчна запрашаем у свет вады з большай мінералізацыяй», — newmandrew.
«У нас яшчэ і тэмпература вады пачала мяняцца 500 разоў за 20 хвілін, пакуль прымеш душ. Толькі наладзіш камфортна, дзве хвіліны — і ты ўжо варышся ў кіпні», — ann.strigelskaya.
«Ды куды ўжо горш. Я заўсёды жыла ў раёнах, дзе ваду з-пад крана можна піць. Але калі была ў гасцях у Сухараве, Малінаўцы — толькі ва ўнітазах змываць. Вада была непрыдатная больш ні для чога. Дык куды ўжо горш?» — gridyushko_elena.
«Фрунзенскі р-н, усё дакладна гэтак жа, акрамя паху хлоркі», — guru_spa_tcm.
«Усё так, недзе нас падманулі», — nickolayka.
Нагадаем, што з 10 студзеня 2025-га ўсе раёны Мінска цяпер забяспечваюцца артэзіянскай вадой.